Inissialiornermut tapersiissuteqartarneq pillugu Inatsisartut peqqussutaata allanngortinneqarneranik Inatsisartut peqqussutaat nr. 19, 12. november 2001-imeersoq.
(Akiliutissat akiligassanngortut taarsigassarsiallu amiakkuisa isumakkeerfigineqartarnissaat)
§ 1.
Inissialiornermut tapersiissuteqartarneq pillugu Inatsisartut peqqussutaanni nr. 1, 9. april 1992-imeersumi Inatsisartullu inatsisaatigut nr. 3, 30. oktober 1998-imeersukkut allannguiffigineqarsimasumi makku allannguutigitinneqassapput:
1. § 21a-tut ilanngunneqassaaq:
"§ 21a. Taarsigassarsiallit piffissami 1. maj 2000-imit 30. april 2002-p tungaanut pisinnaatitaaffigalugu ineqarnermut tapinik pissarsisarsimasut 1. november 2002 nallertinnagu Naalakkersuisunut qinnuteqarnermikkut akiligassanngorsimasunik taarsigassarsiallu amiakkuinik isumakkeerfigineqarsinnaapput.
Imm. 2. Taarsigassarsiallit ukiuni kingullerpaani marlunni inaarlugit akileraarfiusumi akileraarutaasussanik ukiumut 128.000 kr.-it ataallugit inoqutigiittut isertitaqartarsimasut akiligassanngorsimasunik taarsigassarsiallu amiakkorilersimasaannik isumakkeerfigineqarnissaminnik qinnuteqarsinnaapput. Meeqqanut angerlarsimaffimmi najugaqartunut18-it inorlugit ukiulinnut, najukkamilu najugaqartututu inuit nalunaarsorsimaffianni nalunaarsorneqarsimasunut, tamanut, amerlanerpaamilli meeqqanut arfinilinnut, isertitanut killigititaq meeqqamut ataatsimut 4.000 kr.-inik qaffanneqartassaaq.
Imm. 3. Akiligassanngorsimasunik taarsigassarsiallu amiakkorilersimasaannik, tak. imm. 2, isumakkeerfigineqarnissamik qinnuteqaatit Naalakkersuisunut ingerlatinneqassapput. Qinnuteqaatit naliliiffigineranni qinnuteqartup pigisai nalillit inuussutissarsiorsinnaaneranillu naatsorsuutigisaq kiisalu illup pisoqaassusia niuernikkullu nalinga isiginiarneqartassapput.
Imm. 4. Akiligassanngorsimasut taarsigassarsiallu amiakkorilersimasaannik isumakkeerfigineqarnissamik qinnuteqaatit suliarineqartarnissaat pillugu Naalakkersuisut malittarisassiussapput."
§ 2.
Peqqussut atuutilissaaq ulloq 1. januar 2002. Taamaattorli aatsaat isumakkeerinnittoqarsinnaavoq 1. maj 2002-mit atuuttumik.
Namminersornerullutik Oqartussat, ulloq 12. november 2001.
Jonathan Motzfeldt/
Jørgen Wæver Johansen